Een plattdüütsch Kolleg in Loccum - Förtbildung för Predigerinnen un Predigers
Leeve Lüü,
ji köönt jo anmellen to dat plattdüütsche Pastoralkolleg 2026! Van`n 9. - 12. Februar hebben wi mitnanner moje Daag in Loccum unner dat Motto: "Moderspraak un Vaderunser - Plattdüütsch wannelt sük". Dat Kolleg maakt de plattdüütsche Spraak sülvst to´n Thema. Wo verännert sük de Spraak un entwickelt sük wieder? Wat maakt Plattdüütsch so besünners? Wat lett sük up Platt anners seggen as up Hochdüütsch? Waar liggen Grenzen van dat, wat seggt worden düürt?
To Beginn gahn wi torügg in de Geschichte un kriegen to weten, wo Plattdüütsch sük entwickelt hett. Wi kieken up dat Thema “Gendern” - waar kummt dat her un wo geiht dat “up Platt”? An uns Spraak in Liturgie un Gottesdeenst willn wi arbeiden, plattdüütsche Spraakkünstler*innen up de Bühn beleben un Nejes ut dat Nedderdüütsch-Sekretariat in Hambörg hören. Klönen un Keiern kummt ok nich to kört.
Deelnehmer ut dat Gebiet van´t Pastoralkolleg Neddersassen betalen 25 Euro pro Övernachtung.
Well ut´n anner Landeskark kummt, mutt 50 Euro pro Övernachtung betalen.Deelnehmen köönt all, de interesseert sünd an Plattdüütsch in de Kark.
De Anmeldung löppt (bloot) över de Homepage van´t Pastoralkolleg Neddersassen: https://www.pastoralkolleg-niedersachsen.de/Pastoralkolleg
Wi freien uns up jo! Gröten van Harten, Imke Schwarz un Friederike Goedicke
Pastoralkolleg Niedersachsen, Tagungsstätte Loccum
|
Münchehäger Str. 6
|
31547
Rehburg-Loccum
