Vörwoord (2014)
Je länger De Kennung vun 1978 an in de Regel twee Maal in’t Johr un vun 1992 an bavento Johr för Johr mit’n Biheft rutkaamen dä, üm so mehr wœrr kloor, dat een Register nöödig wüür. Man wokeen künn düsse Arbeid blangenbi doon?
Rutgeverkring un Redaktschoon wüüren dorüm heilfroh, as sik dor nah veel Fraagen un Överleggen twee to fünnen: De Schoolmester Heiko Frese wull tohoop mit Pastor Peter Voigt düsse Opgaav angahn.
Dacht wüür toierst, dat to’n 25. Jubiläum vun de Tiedschrift 2003 dat Wark trecht warden müch. De Arbeid kööm in’n Gang. Man dat se wiedergüng, har sien Nood.
Twüschendörch geev dat för de beiden Hauptakteure een anner Saak, de Tied un Kraft kösten dä: een Gesamtutgaav vun Johannes Jessen sien Bibelœversetten. All de Texten, in Fraktur druckt, schüllen in Antiqua ümsett un korrigeert warden. As dat Book 2006 bi Vandenhœck und Ruprecht in Göttingen in’n Druck güng, kunn endlich dat Register för De Kennung wietergahn.
Nu wœrr plaant, de Arbeid op 30 Johrgäng uttowieden. An’n Enn‘ sünd dat 35 worden: fief Johrgäng, de Johann Diedrich Bellmann tohoopstellen kunn un 30, de Bernd Jörg Diebner redigeert hett. Dat is en Barg Material, wat hier, schöön opdeelt, œversichtlich utbreedt ward: een Togang to een Generatschoon nedderdüütsch Karken- un Kulturgeschicht, as se sik in De Kennung mit ehr Biheften daalslaan hett.
De Kennung-Konferenz un de Arbeitsgemeenschaft Plattdüütsch in de Kark Neddersassen/Bremen dankt Heiko Frese, Lümborg, un Peter Voigt, Posthuusen, un jem ehr Hülpslüüd Anke Frese, Patricia Köller, Silke Qualmann, Maren Stephan un Gerda Wilmsen för den grooten un gooden Deenst, den se eenmit’nanner daan hebbt. Ok hier güllt: Dat Wark lœvt den Meister.
Burgdörp un Soltau, März 2014
Anita Christians-Albrecht, Heinrich Kröger un Wilko Burgwal